मलेठ घटनाको आज पाँच वर्ष पूरा ,सम्मानमा सार्वजनिक विदा

  अशोक झा
राजविराज २३ फागुन ।                                                आज फागुन २३ गते अर्थात मलेठ घटनाको आज (सोमवार) पाँच वर्ष पूरा भएको छ ।
सप्तरीको मलेठ घटनामा सहिद भएकाहरुको सम्झानामा राजविराज नगरपालिकाले सोमवार सार्वजनिक विदा समेत दिएको छ ।
मधेश आन्दोलनका क्रममा ०७३ साल फागुन २३ गते तत्कालिन मलेठ गाविस (हाल राजविराज नगरपालिका–९)मा ज्यान गुमाएका पाँच जना सहिदहरुको सम्झना एवम् सम्मानमा सार्वजनिक विदा दिने निर्णय गरिएको नगरप्रमुख शम्भु प्रसाद यादवले मधेश न्युजलाई जानकारी दिए ।
नेकपा एमालेले आयोजना गरेको मेचीमहाकाली राष्ट्रिय अभियानका क्रममा तत्कालिन संयुक्त लोकतान्त्रिक मधेशी मोर्चाले विरोध गरेपछि झडप भएको थियो ।
झडपका क्रममै प्रहरीले चलाएको गोली लागेर मलेठका सञ्जन मेहता, पिताम्बर मण्डल र बिरेन्द्र महतो, प्रसवनीका आनन्द साह तथा जमुनी मधेपुराका इन्द्रदेव यादवको मृत्यु भएको थियो । सो घटनाका क्रममा ज्यान गुमाएका पाँचै जनालाई सरकारले सहिद घोषणा गरेको थियो ।