सातौँ नेपाल कल्चरल इन्टरनेशनल फिल्म फेस्टिभल सम्पन्न

ईमधेश न्इूज सम्वाददाता,
काठमाडौं, १९ माघ ।
 नेपाल संस्कृति तथा चलचित्र केन्द्रको आयोजनामा सातौँ नेपाल कल्चरल इन्टरनेशनल फिल्म फेस्टिभल (एनसिफ) २०२६ काठमाडौँमा सम्पन्न भएको छ । माघ १६ देखि तीन दिनसम्म चलेको महोत्सवमा ३९ देशका ८५ चलचित्र प्रदर्शन गरिएका थिए । समापन समारोह भृकुटीमण्डपस्थित नेपाल पुलिस क्लबमा आयोजना गरिएको हो ।
समारोहमा राष्ट्रिय तथा अन्तर्राष्ट्रिय चलचित्र र चलचित्रकर्मीलाई विभिन्न विधामा अवार्ड प्रदान गरियो । राष्ट्रिय फिचर चलचित्रतर्फ सुवर्ण थापाको निर्देशनमा बनेको ‘द सेक्रेट अफ राधा’ सर्वोत्कृष्ट घोषित भयो । ‘ज्वाइँ साब’ बाट जितु नेपाल सर्वोत्कृष्ट अभिनेता र ‘कोसेढुंगा’ बाट सुरक्षा पन्त सर्वोत्कृष्ट अभिनेत्री घोषित भइन् । सोही चलचित्रका निर्देशक सरोज पौडेल सर्वोत्कृष्ट निर्देशक बने भने ‘द सेक्रेट अफ राधा’ का लागि नरेन्द्र मैनालीले छायांकन अवार्ड पाए ।
अन्तर्राष्ट्रिय फिचर चलचित्रतर्फ भारतका निर्देशक जयन चेरियनको ‘रिदम अफ दमाम’ सर्वोत्कृष्ट ठहरियो । विभिन्न देशका चलचित्रले छोटो चलचित्र, वृत्तचित्र, महिला, बाल, मानव अधिकार, वातावरण तथा एनिमेशन विधामा अवार्ड जिते ।
महोत्सवमा ४० भन्दा बढी अन्तर्राष्ट्रिय चलचित्रकर्मी, निर्णायक र अतिथिहरूको सहभागिता रहेको थियो । बागमती प्रदेश संस्कृति तथा पर्यटन मन्त्रालय, चलचित्र विकास बोर्ड र नेपाल पर्यटन बोर्डको सहकार्यमा सम्पन्न महोत्सवले नेपाली तथा अन्तर्राष्ट्रिय चलचित्र संस्कृतिलाई जोड्ने महत्वपूर्ण मञ्च प्रदान गरेको आयोजकले जनाएको छ ।